Seçimimiz Gələcəyimizdir

3

  Mən Süleymanova Müjgan, 95/100 GPA ilə Bakı Mühəndislik Universitetinin ingilis dili üzrə Riyaziyyat və İnformatika müəllimliyi ixtisasında təhsil alan sonuncu kurs tələbəsiyəm. İlk olaraq, ixtisasım haqda qısa məlumat verim. Adından da göründüyü kimi iki ixtisası özündə birləşdirir.  Bunun özü isə çox böyük bir üstünlükdür, hansı ki, universiteti bitirdikdən sonra istədiyin istiqamətdə özünü inkişaf etdirirək uğur qazanmaq olar. Müasir dövrümüzdə elm və texnologiya sürətlə inkişaf edir və bunu üzə çıxarmaq üçün yüksək qabiliyyətli mütəxəssislərə ehtiyac duyulur. Riyaziyyat və informatika müəllimliyi ixtisası da hər ikisinin inkişafına kömək üçün savadlı kadrlar yetişdirir. Bu ixtisas təhsil aldığı müddətdə tələbələrə həm informatika ilə bağlı proqramlaşdırma dilləri, kompüter qurğuları, həm riyaziyyatla bağlı riyazi analiz, həndəsə, cəbr, həm də pedaqogika, psixologiya və s. ilə bağlı ümumi anlayışların qazanılmasında yardım edir. İxtisas üzrə ali məktəb diplomu aldıqdan sonra orta ixtisas məktəblərində və ali məktəblərdə müəllim kimi, həmçinin mühəndis, proqramçı, kompüter üzrə hər hansı bir sahədə, bank sektorlarında və s. fəaliyyət göstərmək olar.

  Məktəb illərimdən bəri dəqiq elmlərə xüsusi marağım olub. Belə ki, hər zaman yeni riyazi düsturlar kəşf etməyə və onlardan istifadə etməyə çalışmışam. Həmçinin təhsil aldığım məktəbin fəal tələbələrindən biri olaraq istər təhsil aldığım təhsil ocağı, istərsə də rayonum üçün daim fəxr qaynağı olmuşam. Elə o dövrdən həmişə bu ixtisas üzrə təhsil almaq, orta və ya ali məktəbdə müəllim kimi fəaliyyət göstərmək ən böyük arzum olub. Bu yolda ən böyük dəstəkçim isə nənəm olub. O, həmişə içimdən nə gəlirsə, maraq dairəmə nə uyğundursa, o yöndə davam etməyimi istəyirir. Çünki insan seçdiyi peşəni sevməli, həvəslə işləməli, başqalarının təsiri ilə hərəkət etməməlidir. Yalnız bu zaman uğurlu bir yolda addımlaya bilər və peşman olmazsınız. Qarşınızdakı ən  böyük məsuliyyət məhz bu seçimdir, hansı ki, gələcək həyatınıza birbaşa təsir edir.

  Bu sahədə uğur əldə etmək üçün ilk öncə təhsil aldığınız müddətdə ixtisasınız haqda olan şeyləri dərindən mənimsəməli, hansı sahə üzrə davam edəcəyinizi əvvəlcədən qərarlaşdırmalı, özünüzü o yöndə yetişdirmək üçün var gücünüzlə çalışmalısız. Fənləri yalnız yüksək qiymət almaq üçün yox, həm də öyrənmək və gələcəkdə tətbiq etmək üçün mənimsəməlisiniz. Universitet həyatı boyunca özünüinkişaf üçün məqsədli və planlı şəkildə çalışmaq vacibdir. Əks halda imtahan üçün oxunulmuş əzbərçi bir sisteminiz olur və daha sonra hamısı unudulub gedir. Universitetin klublarında, digər fəaliyyətlərdə yaxından iştirak edərək bununla özünüzə yeni bir şeylər qata və dünyagörüşünüzü zənginləşdirə bilərsiz. Qarşınıza çıxan imkanları dəyərləndirmək üçün yeniliklərə hər zaman açıq olmalısınız. Bir çox insanlar uğurun, fürsətlərin heç bir addım atmadan, oturduqları yerdən gəlməsini gözləyirlər. Bu  tamamilə yanlış düşüncədir.

  Əgər müəllim olaraq çalışmaq istəyirsinizsə, bunun üçün öz peşənizi sevməli, fənn üzrə lazımlı bilikləri əldə etməklə yanaşı, bir sıra şəxsi bacarıqları da inkişaf etdirmək lazımdır. Bunlardan ən vacibi ünsiyyət qabiliyyəti və uşaq psixologiyasını anlamaqdır.

  İnformatika sahəsində uğur əldə etmək üçün texnoloji yeniliklərlə maraqlanmaq, proqramlaşdırma dillərini öyrənmək və ya İT ilə bağlı  hər hansı sahədə bacarıqlı olmaq lazımdır. Yaranan əlverişli mühiti bir fürsət olaraq dəyərləndirə bilməliyik. Ona görə də fürsətləri tam vaxtında görməyi bacarmalıyıq.

  Hər iki sahə  üzrə də daha yaxşı uğur əldə etmək üçün  magistr üzrə təhsilinizi davam etdirə bilərsiz. Mən öz təhsilimi İT və ya Kompüter mühəndisliyi üzrə inkişaf etdirməyi düşünürəm. Bununla da, mən həm ixtisasımı təkmilləşdirə, həm də karyera planlamamı yönləndirə bilərəm. Çünki dövrümüzdə istər ölkəmizdə, istərsə də xaricdə bu sahələr üzrə bacarıqlı kadrlar hər zaman arzuolunandır.

   Bu yol nə qədər uzun və keşməkeşli görünsə də, sonda bütün əziyyətlərə dəyir. Çünki oxuduğun, əziyyət çəkdiyin illər sonda özünə mükafat olaraq qayıdır. Bilik və bacarığı olan hər bir insan gec-tez uğur qazana bilir, əsas olan sizin içinizdəki özünüinkişaf istəyinin və həvəsinin ölməməsidir. Unutmayın ki, sizin seçiminiz sizin Gələcəyinizdir. Hər birinizə bu yolda uğurlar arzu edir və ümid edirəm ki, gələcəyinizi istəklərinizə uyğun şəkildə inşa edərsiniz.

Müjgan Süleymanova