Elektroenergetika mühəndisliyi - Elektrik təchizatı (sahələr üzrə) ixtisası haqqında
İxtisasın qısa təsviri
Elektrik enerjisi təchizatı istehlakçıların gecə-gündüz, tələb olunan həcmdə və yüksək keyfiyyətli elektrik enerjisi ilə təmin olunmasını nəzərdə tutur. Elektrik enerjisi təchizatı sisteminin layihələndirilməsi təmir işlərinə başlamazdan əvvəl həyata keçirilməlidir. Çünki elektromontaj işləri bəzək işləri ilə paralel şəkildə, ilkin mərhələlərdə – dizaynın hazırlanması mərhələsində icra olunur.
Elektromontaj işləri zamanı təhlükəsizlik əsas şərtlərdən biridir. Qeyri-peşəkar icra nəticəsində insanların sağlamlığı və həyatı təhlükə altına düşə bilər. Elektrik enerjisi təchizatı sisteminə artırıcı və azaldıcı yarımstansiyalar, paylayıcı elektrik şəbəkələrini qidalandıran transformatorlar, müxtəlif köməkçi qurğular və tikililər daxildir.
İxtisasın gələcəyi
Bu gün elektrik mühəndislərinə xüsusilə tikinti sənayesində böyük tələbat var. Binaların elektrik enerjisi ilə təchiz olunması, bu prosesə nəzarət və əlaqəli texniki işlər elektrik mühəndislərinin əsas vəzifələrindəndir. Ölkəmizdə istehsal sahələrinin modernləşdirilməsi və xarici sənaye şirkətlərinin artan fəaliyyəti bu ixtisasın gələcəkdə daha da inkişaf edəcəyini göstərir.