Gəmiqayırma və gəmi təmiri mühəndisliyi ixtisası haqqında
Gəmiqayırma və gəmi təmiri mühəndisliyi ixtisası
İxtisasın təsviri
İxtisas dənizçilik ixtisasları qrupuna daxil olan, mühəndislik ixtisasıdır. İxtisas məzunları gəmi inşasında çertyojların çəkilməsi və mühüm hesabatların aparılması üzrə ixtisaslı kadr olaraq hazırlanırlar. “Gəmiqayırma və gəmi təmiri mühəndisliyi” ixtisası üzrə təhsil alan tələbələr ümumpeşə hazırlığı fənləri ilə yanaşı ixtisaslaşmaya aid gəmilərin quruluşunu, üzmə keyfiyyətlərini, gəmi gövdəsinin konstruksiyalarını, gövdə konstruksiyalarının qaynaq texnologiyasını, gövdənin korroziyadan mühafizə tədbirlərini, gəmi inşaat mexanikasını, gəmiqayırma və gəmi təmiri texnologiyasını, gəmilərin layihələndirilməsini, avtomatik layihələndirmə sistemlərini və bu sahədə tətbiq edilən xüsusi müasir proqram təminatlarını (CADMATIC, Autodesk Inventor, AutoCad) öyrənirlər.
İxtisasın tarixi
Sahənin tarixi İngiltərədə gəmi ilə şərab daşınmasının inkişafı ilə bağlı olmuşdur. Sonradan XIII əsrin sonlarına yaxın davamlılıq və digər prinsiplər əsas götürülərək bu sahə inkişaf etdirilmişdir. Bu vaxta qədər taxtadan inşa olunan gəmilər, artıq tədricən metaldan hazırlanmağa başlanıldı.
Ölkəmizdə akademiya (Azərbaycan Dövlət Dəniz Akademiyası) 1996-cı ildən fəaliyyət göstərir və 2013-cü ildə ilk gəmiqayırma zavodu tikilib (bundan əlavə daha 2 təmir zavodu var).
Bu ixtisas sahibi nə işlə məşğul olur? (iş öhdəlikləri)
“Gəmiqayırma və gəmi təmiri mühəndisliyi” ixtisası üzrə məzun olanlar bu sahədə fəaliyyət göstərən müəssisə və təşkilatlarda mühəndis, texnoloq, konstruktor və s. vəzifələrdə çalışa bilərlər. İlk olaraq məzun zavodda fəhlə (qaynaqçı) kimi işə başlayır və gəmi hissələrinin təmiri və ya tikintisi işləri ilə birbaşa məşğul olur. Daha sonra isə baş mühəndisə qədər yüksəlmək imkanı əldə edirlər. Qeyd olunan vəzifələrdən asılı olaraq iş öhdəliklərini aşağıdakı kimi ümumiləşdirmək olar:
- Gəmi hissələrinin təmiri, tikintisi və qaynaq işlərinin həyata keçirilməsi
- Təmir işlərinin aparılması, işlərin keyfiyyətli və vaxtında yetirilməsi, işin gedişi ilə bağlı gündəlik hesabatın hazırlanması
- Gəmi tikintisi və təmiri ilə bağlı layihələndirmə işləri, xüsusi proqramlar vasitəsilə çertyojların hazırlanması
Harada bu ixtisasa sahiblənmək olar?
➝ Azərbaycan Dövlət Dəniz Akademiyası
Bu ixtisas üzrə harada çalışmaq olar?
- “Bakı Gəmiqayırma Zavodu”
- Azərbaycan Xəzər Dəniz Gəmiçiliyi nəzdində olan təmir və tikinti zavodlarında
- “Palmali” şirkətlər qrupu və digər özəl şirkətlərdə
- XDNLA-ETİ (layihə institutu)
Bu ixtisas üzrə lazım olan bilik və bacarıqlar (kompetensiyalar)
- Analitik düşünmə bacarığı
- Hesablama bacarığı
- Analiz etmək bacarığı
- Əl qabiliyyətinin yaxşı olması (çertyoj çəkmək üçün)
- Avtomatik layihələndirmə sistemlərini və bu sahədə tətbiq edilən xüsusi müasir proqram təminatları (CADMATIC, Autodesk Inventor, AutoCad) üzrə biliklər
- Kompüter bilikləri
İxtisasın gələcəyi
Bu sahə ölkədə yeni sektordur, inkişaf etməkdədir. Xəzər hövzəsindəki ən böyük zavodlar bizimdir və nəticə etibarı ilə çox sayda sifarişlər həyata keçirilir. Bu sahə günü-gündən inkişaf edir və savadlı kadrlara ehtiyac artır.
Əmək haqqı
Bu sahə üzrə başlanğıc əmək haqqı 600 AZN civarındadır. Məbləğ təmirə gələn gəmilərin sayından (eləcə də tikilən gəmilərin) və s. asılı olaraq artır.